29 noyabrda Xətai Rayon Məhkəməsi Abzas Media ilə bağlı cinayət işində adı keçən şəxslərə və onların bir çoxunun ailə üzvlərinə məxsus bank hesablarına həbs qoyulub.
Bu barədə məlumatı araşdırmaçı jurnalist Hafiz Babalı yayıb. O, məlumatı vəkil Elçin Sadıqov vasitəsi ilə əldə edib.
Bank hesablarına həbs qoyulmasından başqa məhkəmə həm də vergi ödənişləri və hüquqi şəxslərin pay sahibliyi barədə məlumatların Bakı Şəhər Baş Polis İdarəsinə təqdim olunması barədə də qərar çıxarıb.
Hafiz Babalı “Facebook” postunda onu da yazır ki, əldə etdiyi sənədə görə o, təqsirləndirilən şəxsdir.
Araşdırmaçı jurnalist 28 noyabrda Bakı Şəhər Baş Polis İdarəsində şahid qismində dindirilib. Ona Abzas Media, orada dərc edilən araşdırmalar, özünün maliyyə mənbələri barədə suallar verilib. Jurnalist dərc edilən bir neçə araşdırmanın müəllifi olduğunu gizlətmir.
İttiham tərəfi məni hansı qanunsuz əməldə gunahlandıra bilər? Başa düşürəm, elə bir mühitdə, cəmiyyətdə və hakimiyyət altında yaşayırıq ki, istənilən məsum insanı ən ağır cinayətdə belə bu ölkənin marionet məhkəməsi ittiham edib həbsə ata bilər və edir – nümunələr kifayət qədərdir. Abzas’la əməkdaşlıq etmişəmmi? Bəli. Jurnalistəm. Bu, mənim işimdir.
Hafiz Babalı
Nə baş verib: 20 noyabrdan bəri Abzas Media-ya qarşı Azərbaycan hökumətinin repressiya dalğası başlayıb. Saytın direktoru, direktor müavini, baş redaktoru və bir jurnalisti həbs edilib. Onlar barədə qaçaqmalçılıq maddəsi ilə cinayət işi başlanıb.
Saytın digər əməkdaşları isə Bakı Şəhər Baş Polis İdarəsinə ifadə verməyə çağırılır.
Hökumətin nəzarətində olan saytlar və televiziyalarda Abzas Media-ya qarşı qaralama kampaniyası aparılır. Hazırlanan yazılar və sujetlərdə medianın ölkəyə qaçaqmalçılıq yolu ilə külli miqdarda pul gətirməsi barədə ittihamlar səsləndirilir.
