Amntesy International Hüquq müdafiə təşkilatı professor Qubad İbadoğlu ilə bağlı Azərbaycan prezidenti İlham Əliyevə məktub ünvanlayıb. Mikroskop Media xəbər verir ki, məktubda barəsində cinayət işi açılan və 9 ay həbsdə qalan professor Qubad İbadoğluna qarşı irəli sürülən bütün ittihamların götürülməsi tələb olunur.
Məktubda nə deyilir?
Qurum məktubda qeyd edir ki, 22 apreldə onun ev dustaqlığına buraxılmağı bu məsələdə müsbət hal olsa da professor və siyasətçinin səhhətindəki problemlər hələ də qalır:
“Ev dustaqlığı onun işində müsbət hal olsa da, o hələ də onun təcili tələb etdiyi qayğını, lazımi tibbi yardımı ala bilmir. Mən sizi doktor Qubad İbadoğluya qarşı irəli sürülən bütün ittihamların ləğv edilməsi üçün lazımi addımları atmağa və xaricdə adekvat səhiyyə xidmətlərindən istifadə etmək üçün onun ölkəni tərk etməyinə icazə verilməsinə çağırıram”. – məktubda deyilir.
Məktubda qeyd olunur ki, ailəsi Qubad İbadoğlunun ürək xəstəliyi, 2-ci tip şəkərli diabet, böyrək xəstəliyi, şiddətli bel ağrılarından əziyyət çəkdiyini bildirir. Buna əsasən Amnesty International məktubunda professora Azərbaycanda da adekvat tibbi xidmətə çıxış imkanı verilməsini tələb edir:
“Bu arada seçdiyi əcnəbi həkimin ona evdə baş çəkməsinə icazə vermək də daxil olmaqla, Azərbaycanda adekvat tibbi xidmətə çıxış imkanı verilməlidr.”
Amnesty International prezident İlham Əliyevi digər fəal və jurnalistlərə qarşı da bütün siyasi motivli ittihamları ləğv etməyə çağırıb:
“Mən sizi həmçinin Azərbaycanda cinayət mühakiməsi sistemindən tənqidçilər və dissidentləri hədəf almaq üçün sui-istifadəyə son qoymağa çağırıram. Azərbaycanda hüquq müdafiəçilərinə, fəallara və jurnalistlərə qarşı bütün siyasi motivli ittihamlar dərhal ləğv edilsin”.
Nə baş verib?
Azərbaycan Demokratiya və Rifah Partiyasının sədri, iqtisadçı professor Qubad İbadoğlu 2023-cü il iyulun 23-də saxlanılıb. Onun barəsində Cinayət Məcəlləsinin 204.1-ci – satış məqsədi ilə saxta pul, qiymətli dövlət kağızları əldə etmə və ya satma – maddəsi ilə cinayət işi başlanıb.
Qubad İbadoğlu öz həbsi barədə qısa şərh verə bilib:
İlham Əliyevin sifarişi ilə saxlanılmışam.
Həbslə bağlı Azərbaycan Daxili İşlər Nazirliyinin yaydığı rəsmi məlumata görə, əməliyyat Türkiyə Daxili İşlər Nazirliyindən daxil olan məlumat əsasında keçirilib.
2024-cü il aprelin 22-də Q.İbadoğlu ev dustaqlığına buraxılıb.
