İqtisadçı professor Qubad İbadoğlunun Kürdəxanı Təcridxanasında saxlanıldığı kamerada gecələr işıq söndürülmür. Artıq 33 gündür davam edən psixoloji təzyiqlə bağlı onun qardaşı Qalib Toğrul məlumat yayıb.
İşıq sönmür deyə gecələr yata bilməyən Qubad İbadoğlunun gözlərinin altında şişkinlik əmələ gəlib.
“Bu, artıq psixoloji təzyiq də deyil, fiziki işgəncədir. Vəkillərin şikayətini qulaqardına vuran təcridxana rəhbərliyinin bu kimi qeyri-insani rəftarı səbəbindən qardaşımın şəkəri, təzyiqi və ürək döyüntüsü normallaşmır”.
Bundan əvvəl isə qohumları Qubad İbadoğluna göndərilən sovqatın ona çatdırılmamasından şikayət edirdi. Təcridxana rəhbərliyi kitab, dərman, qida və sanitar təmizlik üçün nəzərdə tutulan vasitələri müxtəlif bəhanələrlə professora vermir.
Nə baş verib?
Azərbaycan Demokratiya və Rifah Partiyasının sədri, iqtisadçı Qubad İbadoğlu 23 iyulda saxlanılıb. Onun barəsində Cinayət Məcəlləsinin 204.1-ci – satış məqsədi ilə saxta pul, qiymətli dövlət kağızları əldə etmə və ya satma – maddəsi ilə cinayət işi başlanıb.
Qubad İbadoğlu öz həbsi barədə qısa şərh verə bilib: “İlham Əliyevin sifarişilə saxlanılmışam”.
Həbslə bağlı Azərbaycan Daxili İşlər Nazirliyinin yaydığı rəsmi məlumata görə, əməliyyat Türkiyə Daxili İşlər Nazirliyindən daxil olan məlumat əsasında keçirilib.
