Avropa İnsan Hüquqları Məhkəməsi 39-cu qaydanı əsas tutaraq iqtisadçı professor Qubad İbadoğlunun işinə dərhal baxılmasına qərar verib.
Bu barədə məlumatı həbsdə olan iqtisadçının qardaşı Qalib Toğrul yayıb.
Avropa İnsan Hüquqları Məhkəməsi artıq Azərbaycan hökumətinə suallar da göndərib.
Qalib Toğrul deyir ki, işə dərhal baxılmasının səbəbi Qubad İbadoğlunun səhhətinin kəskin pisləşməsidir.
Azərbaycanın müvafiq icra hakimiyyəti strukturlarından (hakimiyyətindən) başqa hər kəs bu təhlükəni görür və nəsə etməyə çalışır. Qardaşımın tezliklə azadlığa qovuşmasına ümidlərimiz artır!
Qalib Toğrul
39-cu qayda nədir?
39-cu qayda deyəndə Avropa İnsan Haqları Konvensiyasının maddəsi nəzərdə tutulur. Həmin maddənin tələblərinə əsasən, sağlamlığı ilə bağlı problemi olan şəxslərin işinə prioritet qaydada, yəni növbədənkənar baxılır.
İqtisadçının ailə üzvlərinə qarşı təzyiq var
Qubad İbadoğlunun digər qardaşı da daxil olmaqla onun qohumlarından bir neçəfərin ölkədən çıxışına qadağa qoyulub. Qalib Toğrul yazır ki, qadağa təkcə Bayramovlara deyil, digər soyaddan olan qohumlara da tətbiq olunub.
“Halbuki, Qubad müəllimə qarşı uydurulmuş cinayət işində hansısa qardaşının və ya qohumunun adı heç şahid qismində də keçmir”.
Bundan əvvəl isə Qubad İbadoğlunun qaldığı kamerada işıq söndürülmürdü, ailəsinin isə ona göndərdiyi dərman və təmizlik vasitələri təcridxana rəhbərliyi tərəfindən çatdırılmırdı.
Nə baş verib?
Azərbaycan Demokratiya və Rifah Partiyasının sədri, iqtisadçı Qubad İbadoğlu 23 iyulda saxlanılıb. Onun barəsində Cinayət Məcəlləsinin 204.1-ci – satış məqsədi ilə saxta pul, qiymətli dövlət kağızları əldə etmə və ya satma – maddəsi ilə cinayət işi başlanıb.
Qubad İbadoğlu öz həbsi barədə qısa şərh verə bilib: “İlham Əliyevin sifarişilə saxlanılmışam”.
Həbslə bağlı Azərbaycan Daxili İşlər Nazirliyinin yaydığı rəsmi məlumata görə, əməliyyat Türkiyə Daxili İşlər Nazirliyindən daxil olan məlumat əsasında keçirilib.